ایران کې د ګاډو ټکر ۲۴ افغان مسافر وژلي

د افغانستان کډوالو چارو وزارت بي بي سي ته ویلي، د ایران په 'سیستان' ولایت کې د ټکر له کبله ۲۸ کسان وژل شوي چې ۲۴ په کې افغان مسافر دي. ۲۸ نور ټپیان شوي. یاد وزارت وايي، دغه افغانان په قاچاقي ډول ایران ته تللي وو او د پېښې ځای ته له تهرانه د افغانستان د سفارت ځینې چارواکي ورغلي دي.

افغانستان کې په شکر ناروغۍ د اخته کسانو شمېر په لوړېدو دی

نن 'نومبر ۱۴مه' له شکرې ناروغۍ سره د مبارزې نړیواله ورځ ده. افغانستان کې یوه څېړنه ښيي، چې پر دې ناروغۍ د اخته کسانو شمېر له ۲٫۴ سلنې اوس ۵٫۳ سلنې ته لوړ شوی دی. د شکرې ناروغۍ په منجمېنټ کې مناسب خوراک ډېر رول لري. د وزن کموالی، فيزيکي فعالیت او ورزش یې په درملنه کې زیات مهم دي او اوږد مهاله خطرونه یې کموي.

پاکستان: مولانا فضل الرحمان په اسلام اباد کې خپل احتجاج ختم کړ

د پاکستان جمعیت علمای اسلام ګوند مشر مولانا فضل الرحمان پلازمېنه اسلام اباد کې د لومړي وزیر عمران خان حکومت خلاف احتجاجي غونډې 'ازادي مارچ' ته وینا کې د دغه مارش نوی پړاو اعلان کړ او د غونډې له ګډونوالو یې وغوښتل چې د هېواد په نورو برخو کې له خپلو احتجاج کوونکو ملګرو سره یو ځای شي.

چین کې بین الافغاني ناسته راتلونکو څو ورځو کې کېږي

د سولې په چارو کې د افغان دولت وزارت نن چارشنبه اعلان وکړ چې د افغان سولې په تړاو د چین بین الافغاني ناسته به په راتلونکو څو ورځو کې وشي. ټاکل شوې وه چې دا ناسته د تېرې نومبر میاشتې په ۲۹مه او ۳۰مه نېټه شوې وای، خو د نامالومو لاملونو له کبله هغه مهال ونشوه

کابل کې موټربم" ۷ کسان ووژل او ۱۰ " ټپیان کړل

د افغانستان د کورنیو چارو وزارت ویاند نصرت رحیمي وايي د کابل په پنځلسمه حوزه کې- قصبې ته نږدې- موټر بم چاودلی چې له امله یې ۷ ولسي وګړي وژل شوي او د ۴ بهرنیانو په ګډون ۱۰ نور ټپي شوي دي. تراوسه د دې پېښې مسوولیت کومې وسلوالې ډلې نه دی منلی.

راولپنډۍ پولیس: هغه کس مو نیولی چې د ماشومانو بربنډ فلمونه یې پلورل

د پاکستان د راولپنډۍ ښار پولیس ادعا کوي چې هغه سړی یې نیولی چې پر ماشومانو یې د جنسي تېري پر مهال ویډیويي کلیپونه ثبتول او بیا یې د انټرنېټ له لارې دغه کلیپونه پلورل. چارواکي وايي، پر یو ماشوم د جنسي تېري جرم له کبله دغه سړی برتانیا کې څلور کاله زنداني و.

د ولسمشرۍ ټاکنو لومړنیو پایلو د بیا ځنډېدو احتمال

د افغانستان د ټاکنو خپلواک کمېسیون مشره حوا علم نورستانۍ وايي، په ځینو ولایتونو کې د ټاکنیزو ډلو له لورې د دوی د ولایتي دفترونو د تړلو له امله د لړم پر ۲۳مه د ټاکنو د لومړنیو پایلو د اعلان په اړه اندېښنه لري. مېرمن نوستانۍ وايي، یوازې په یوه ولایت کې د رایو بیا شمېرنه پای ته رسېدلې ده.

افغان حکومت انس حقاني او دوه نور طالب بندیان خوشي کوي

افغان ولسمشر محمد اشرف غني کابل کې یوې خبري غونډې ته له بګرام زندانه په مشروط ډول د طالبانو د درېیو غړو حاجي مالي خان، عبد الرشید او انس حقاني د خوشي کولو اعلان وکړ. نوموړي وویل، د افغانستان امریکايي پوهنتون د دوو تښتول شویو استادانو په موندلو کې یې ګډې هڅې بې پایلې وې.

افغانستان: د زبرځواکونو د سیالۍ ډګر

د نړۍ زبرځواکونو د تاریخ او په اوږدو کې د افغانستان پر وړاندې څه ډول تګلاره او سیاتونه غوره کړي دي. د بېلابېلو نړیوالو زبرځواکونو خپلمنځي اختلافونو افغانستان له څه ډول ستونزو سره مخ کړی دی؟ ایا اوس هم افغانستان کې د نړیوالو زبرځواکونو یوه "ستره لوبه" زوانه ده؟ په دې لیکنه کې همدې موضوع ته کتنه شوې ده

د عبدالله پلویانو ځینو ولایتونو کې د رایو بیا شمېرنې بهیر درولی

د افغانستان د ولسمشریزو ټاکنو د ځینو محلونو د بیا شمېرنې بهیر له پنځو پرته په نورو ولایتونو کې روان رپوټ شوی دی. په دغو پنځو ولایتونو - تخار، بغلان، بدخشان، پروان او پنجشېر کې د نوماند عبدالله عبدالله پلویانو چې له دغه بهیر سره مخالفت لري، ټاکنیز چارواکي بیا شمېرنې ته پرېنښودل

"امريکايي پوځيان نږدې راتلونکي کې افغانستان نه پرېږدي"

د امريکا د لوى درستيزانو د جرگه گۍ مشر ويلي امريکايي پوځيان نږدې راتلونکي کې افغانستان نه پرېږدي. د جنرال ميلي په خبره، امريکايي ځواکونه د سپتمبر له پېښو وروسته په دې موخه افغانستان ته ورغلل چې ډاډ ترلاسه شي دغه هېواد بيا د هغو توندلارو په ځاله بدل نشي چې ښايي امريکا په نښه کړي او دا ماموريت لا نه دى بشپړ شوى

حسن روحاني: ایران کې د تېلو نوې زېرمې موندل شوې دي

د ایران ولسمشر حسن روحاني وایي، په هېواد کې یې د تېلو داسې نوې زېرمې موندل شوې دي چې په راسپړلو به یې د دې هېواد د تېلو تولید یو په درېیمه برخه ډېر شي. دا زېرمې په خوزستان ولایت کې موندل شوې دي او په کابو دوه نیم زره کیلومتره مربع سیمه کې پرتې دي

ټاکنو کمېسیون: په مرکز او ولایتونو کې د رایو بیا شمېرنه پيل شوه

ټاکنو کمیسیون نن یکشنبه د یوې وینا په خپرولو خبر ورکړی چې، د رایو بیا شمېرنه او پلټنه یې په خپلو ولایتي دفترونو کې پیل کړې او بهیر یې د نوماندانو د استازو او کورنیو او بهرنیو ناظرانو او رسنیو له خوا څارل کېږي. یو شمېر ټاکنیزو ډلو غوښتنه کړې چې دا چاره دې ودرول شي

'د افغانستان ښوونیز نصاب تېروتنې لري، عصري نصاب جوړېږي'

د افغانستان د پوهنې وزارت وايي، په اوسني ښوونیز نصاب کې د مضامینو شمېر زیات دی او په یو شمېر کتابونو کې تېروتنې هم شته. چارواکي وايي اوس اړتیا ده چې نوی او عصري ښوونیز نصاب جوړ شي.

غني: تر بل هر وخت اوس سولې ته نژدې شوي یو

د افغانستان ولسمشر محمد اشرف غني کابل کې د میلاد النبي لمانځغونډې پرمهال وویل، په ټولنه کې د تلپاتې سولې لپاره عدالت پکار دی، چې هېڅوک ځان پکې مظلوم ونه ګڼي. نوموړي وویل، افغانان تر بل هر وخت اوس سولې ته نژدې شوي دي.