افغان سفیر: که له افغان مارکیټه چا د افغانستان بېرغ لرې کړ، پېښور کې به کونسلګري وتړو

اسلام اباد کې د افغانستان سفارت له لوري په یوه اعلامیه کې د سفیر شکرالله عاطف مشعل له قوله خبرداری ورکړل شوی چې که دا ځل پېښور کې له افغان مارکیټه افغان بیرغ لرې کړل شو، د احتجاج په توګه به پېښور کې افغان کونسلګرۍ وتړل شي. اعلامیه کې تور پورې شوی چې د سې شنبې پر ورځ پولیسو او پاکستاني چارواکو هڅه کړې چې دغه مارکیټ په غیر قانوني توګه د ځمکو غاصبینو ته وسپاري.

سوریه: لسګونه زره کسان د ترکیې له پوځي عملیاتو وروسته په تېښته دي

رپوټونه وايي، لسګونه زره کسان په شمال ختیځه سوریه کې د ترکیې له پوځي عملیاتو په تېښته دي. ترکان وايي، له پرون (چهارشنبې) راهیسې یې چې عملیات پیل کړل، تر سلو ډېر اورپکي وژلي دی. په سوریه کې دننه نژدې دوه سوه نښې له الوتکو او په توپونو وېشتل شوې دي.

افغان ټاکنې: د بایو مټرېک الو بهرني انجینران کابل ته ورسېدل

د افغانستان د ټاکنو خپلواک کمېسیون وایي، د درملوک په نامه د هغه جرمني شرکت، چې د افغانستان تېرو ولسمشریزو ټاکنو ته یې بایو مټرېک الې چمتو کړې وې، دوه بهرني انجینران کابل ته رسېدلي دي. د یاد کمېسیون د دارالانشا مشر بي بي سي ته وویل، اوس به مرکزي سیستم ته د ټولو رایو د ور ګډولو چاره چټکه شي

"د بکارت پردې معاینه دې افغانستان کې ممنوع اعلان شي"

د افغانستان بشري حقونو خپلواک کمېسیون په هېواد کې د بکارت پردې معایناتو یا ازموینې بې قیده او شرطه ختمولو غوښتنه کړې ده. له دې مخکې د افغانستان قوانینو کېمټې ویلي وو چې د جرمونو څېړنې او پلټنې په صورت کې یوه صلاحیت لرونکې محکمه د بکارت پردې معاینه کولی شي.

ترکیې په سوریه کې خپل پوځي عملیات پیل کړل

د ترکیې ولسمشر رجب طیب اردغان اعلان کړی چې پوځ یې نن چارشنبه په سوریه کې پوځي عملیات پیل کړي دي. داسې وېره شته چې ترکي پوځ ښایي له هغو کردي جنګیالیو سره مخامخ نښته کې ښکېل شي چې تر دې دمه یې د امریکا لخوا پوځي ملاتړ کېده

سپینه ماڼۍ: د ولسمشر ټرمپ د استیضاح مخه به نیسو

سپینې ماڼۍ د امریکا د کانګرس مشرې نانسي پلوسي ته په یوه رسمي لیک کې خبر ورکړی چې دا ماڼۍ د ولسمشر ټرمپ د استیضاح کولو لپاره د څېړنو په برخه کې د همکاري نیت نه لري. د سپېنې ماڼۍ او کنگرس ترمنځ وروسته له هغه شخړه پراختيا مومي، چې د ولسمشر ټرمپ د استيضاح د پلټنې مهم شاهد پرينښودل شو چې شواهد وړاندې کړي.

ملي امنیت د هند لپاره د القاعدې مشر عاصم عمر وژنه تائيد کړه

د افغانستان څارګرې ادارې ملي امنیت ویلي، د هند لویې وچې لپاره د القاعده ځايي مشر عاصم عمر د افغانستان په هلمند ولایت کې وژل شوی دی. د ملي امنیت مسوولین وايي، عاصم عمر د هلمند په موسی کلا کې د هوايي ځواک په بمبارۍ کې وژل شوی دی

ټاکنو کمېسیون: له بایو مټرېک الو د مالومات راټولول ورو پر مخ ځي

د افغانستان د ټاکنو کمېسیون مني چې د معلوماتو ملي مرکز یا(ډیټا سنټر) ته د بایومټریک الو د مالوماتو لېږد، د تمې خلاف ورو پر مخ ځي. د کمېسیون چارواکو په لومړي ځل اندېښنه ښودلې چې که دا چاره همداسې ټکنۍ روانه وي نو ښایي لومړنۍ پایلې پر ټاکل شوې نېټه اعلان نشي

'د ټاکنیزشکایتونو د څېړنې بهیر ۵۰ سلنه مخته تللی'

د افغانستان د ټاکنیزو شکایتونو کمېسیون وايي چې په ۸ ورځو کې به د ټاکنو په اړه ټول ور رسېدلي شکایتونه وڅېړي. د دغه کمېسیون چارواکي وايي چې یو شمېر شکایتونه د ټاکنیزو جرمونو په تړاو دي چې ممکن د رایو په باطلېدو او د ټاکنو په پایله اغېز ولري.

جلال اباد کې چاودنې لږ تر لږه لس کسان وژلي دي

د ننګرهار ولایت مرکز جلال اباد ښار دریمه ناحیه کې نن دوشنبه ماسپښین مهال د ملي اردو د جلب او جذب پر کاسټر موټر برید شوی دی. د ننګرهار د والي ویاند عطا الله خوګیاڼي وایي، په چاودنه کې تر دې مهاله د یو ماشوم په ګډون لږ تر لږه لس کسان وژل شو ي او ګڼ نور ټپیا دي

عبدالله: داسې حکومت به جوړوو چې ټول پکې برخه ولري

د افغانستان اجرائيه رئیس او د ولسمشرۍ ټاکنو نوماند عبدالله عبدالله وایي، داسې یو حکومت به جوړوي چې ټول پکې برخه ولري، او دې برخه کې به ټاکنیز سیاست ته نه ګوري. نوموړي پر ټوېټر لیکلي، یوازې یو ټولشموله حکومت د سولې په اړه د افغانانو ارمانونه پوره کولی شي

د شپږیزې کرېکټ لیګ کابل کې پیل شو

د افغانستان د کورني کرېکټ لیګ شپږیزې شپږم پړاو د شپږو لوبډلو ترمنځ نن (تله ۱۵) په کابل کې پیل شو. دغه سیالۍ چې د کرېکټ بورډ اړوند لوبغالي کې ترسره کیږي، ننۍ لوبه د راشد خان په لوبډلمشرۍ د "بند امیر ښامارانو" او د اصغر افغان په لوبډلمشرۍ د "کابل بازانو" ترمنځ ترسره کیږي.

"۱۱ طالب قومندانان له ۳ هندي انجینرانو سره تبادله شول"

طالب سرچینو بي بي سي ته منلې چې په افغانستان کې یې ۱۱ بندیان له هغو دریو هندي انجنیرانو سره تبادله شوي چې په افغانستان کې د کار پر مهال تښتول شوي وو. سرچینې وایي چې په خوشې شویو طالبانو کې د کونړ له پاره د دوی یو نومېدلی والي او یو شمېر نور قوماندانان راځي

عبدالله د بهرنیو چارو وزارت د ویاند ګوښه کولو حکم رد کړ

د افغانستان اجرائيه رئیس عبدالله عبدالله په یوه اعلامیه کې ویلي چې د بهرنیو چارو وزارت ویاند صبغت الله احمدي به خپلې دندې ته دوام ورکوي. له دې وړاندې نن یکشنبه د ولسمشرۍ ماڼۍ اعلان کړی و چې ښاغلی احمدي یې د هغه د غیر مسئولانه څرګندونو له کبله له دندې ګوښه کړی

ملګرو ملتونو عراق کې د تاوتریخجنو لاریونونو ختمول غوښتي

په داسې حال کې چې د عراق تاوتریخوالي کې د وژل شویو کسانو شمېر سلو کسانو ته رسېدلی، د ګوندونو ګڼ دفترونه سوځول شوي او پر تلوېزیوني چینلونو بریدونه شوي، ملګرو ملتونو په عراق کې د تاوتریخوالي ختمولو غوښتنه کړې ده.